Haurtzaroko sexu abusuei buruz Maddi Ane Txoperenak ‘Ez erran inori’ eleberrian

Posted on 2022-03-17 by KulturSharea

Idazleak 23. Igartza saria jaso zuen 2020ko irailean, idazle gazteei beren proiektua garatzeko ematen den beka da honakoa.

Hurbil egokitu zaion gai bati buruz idatzi du Maddi Ane Txoperena idazle, kazetari eta bertsolariak (Hendaia, 1994)  Ez erran inori eleberrian. Izan ere, gaur Donostian aurkeztu duen lanak haurtzaroko sexu abusuak ditu gai nagusi. Gertutik ezagutzeak eman zion indarra eta gogoa egileari gaian sakontzeko eta fikzioaren bidez lantzeko, “liburuan agertzen den guztia fikzioa dela aurreratu nahi dut, pertsonaiak eta gertaerak asmatuak dira. Iruditzen zait fikzioak musikak eta bestelako arte espresibo batzuek bezala, aukera ematen dutela askotan beste modu batera azaldu ezin daitezkeen gauzei buruz hitz egiteko, nire kasuan hala izan da, aukera eman dit gaia eta pertsonaiak hobeki ulertzeko, haiekin enpatizatzeko eta haien lagun egiteko”, adierazi du.

Lide da eleberriaren protagonista, haurra zela sexu abusu bat pairatu zuen, etxean bertan, Donapaleun. Gertakaria memoriaren zoko batean erdi baztertua eduki du urtetan, baina gaztaroan, Baionan bizi dela, trumilka datozkio irudiak gogora. Oroitzapenetik askatu nahian, sexura joko du ihesbide bila, drogara, plazerera, sorgortasunera… Baina piztia hor da beti, eta ez du bakerik eman nahi.

Liburua idazterako orduan, Txoperenak gaiaz irakurri eta entzundakoak, izan fikziozko liburuak, filmak, poesia zein saiakera liburuak eta podcastak izan ditu inspirazio iturri. Horretaz gain, egileak beraren bizipen propioak, gaiari buruz egin diren hainbat tailer, bertan parte hartu duenetan ezagututako pertsonenak eta baita bere inguruko jendearenak ere jaso ditu. “Tamalez, anitzek bizi izan duten eta bizitzen duten errealitate bat da haurtzaroko sexu abusuena, gehiegitan isiltasunean bizi dena, isiltasunak puskatzeak bere zailtasunak ditu. Eskerrak eman nahi dizkiet isiltasun hori apurtzen laguntzen duten guztiei”.

Idazleak 23. Igartza saria jaso zuen 2020ko irailean Ez erran inori proiektuarekin, idazle gazteei beren proiektua garatzeko ematen den beka da honakoa eta Beasaingo Udalak, CAF enpresak eta Elkar argitaletxeak antolatzen dute.

You may also like

‘Black Is Beltza II. Ainhoa’ filmaren soinu banda aurkeztu dute
Posted on 2022-09-15 by KulturSharea
Soinu banda bihar, irailak 16, kaleratuko dute. Fermin Muguruzak [...]
Nerea Ibarzabal idazleak bere lehen nobela kaleratu du: ‘Bar Gloria’
Posted on 2022-09-14 by KulturSharea
Idazle eta bertsolari bizkaitarrak estreinako nobela du Bar Gloria. [...]
Metrokoadrokak ‘Zeozertan dabil baina ez dakit zertan’ antzezlana prestatzen ari da
Posted on 2022-09-12 by KulturSharea
Antzezkizuna familia ereduei buruzko sitcom poetikoa izango da eta [...]
Jose Luis Otamendi idazlea bueltan da ‘Landura’ poema liburuarekin
Posted on 2022-09-12 by KulturSharea
Landura izena du idazle azpeitiarrak gaur Susa argitaletxearen eskutik [...]
Baztandarren Biltzarra: Orgak Elizondoko karriketara atera dira berriro ere
Posted on 2022-07-18 by KulturSharea
Edizio honetan, Amaiurko gazteluaren erresistentziaren 500. [...]
Rafa Ruedak ‘Oroitz’ kanta eta bideoklipa aurkeztu ditu
Posted on 2022-07-13 by KulturSharea
Larunbatean, bideoko abeslariek eta beste zortzi lagunek osatzen duten [...]
Euskaraldiak ‘Esazu hitz bat’ izeneko abestia aurkeztu du aurtengo ediziorako
Posted on 2022-07-06 by KulturSharea
Xabier Zabalak, Aiora Renteriak, Pettik, Maddalen Arzallusek, Ainhoa [...]
Esti Markezek ‘Hitzekin jolasean’ abestia eta bideoklipa aurkeztu ditu
Posted on 2022-07-04 by KulturSharea
Aiako abeslariak bakarkako ibilbideari ekin dio eta urrian diskoa [...]
Benizzek ‘Mamuak eta izozkiak’ singlea aurkeztu du Ruper Ordorikarekin
Posted on 2022-06-21 by KulturSharea
Beñat Goitia Benizzek Mamuak eta izozkiak izenekohirugarren singlea [...]
12345

Page 1 of 45

Zabaldu: