Eleberriak idazlegai gazte baten eta hark miresten duen idazle eskarmentatu baten arteko topaketa du abiapuntu.
Maialen Berasategi Catalanek Erreplika bere lehen nobela argitaratu du, Susa argitaletxearen eskutik. 1990eko hamarkadan girotutako istorioaren protagonistak Mara Meleiro ikasle gaztea eta Maria M. Muller idazle beteranoa dira. Meleirok sakon miresten duen idazlea itsasertzeko etxe apartatu batean bizi da, maitale ohiak gogoan, zakurra paseatzen eta lorategia zaintzen.
Meleirok idazle izan nahi du, eta ikasle-egoitza batean bizi da, diru gutxirekin eta grina handiz. Mullerrek, berriz, iraganeko amorrua eta musak galdu ditu. Meleiroren begietara, bakardadearen jainkosa da. Bi pertsonaien arteko topaketatik abiatuta, bizitzaren eta kontakizunaren arteko traizioa jorratu du Berasategik.
KulturShareari eskainitako elkarrizketan, idazleak azaldu du Erreplika izenburuak hainbat esanahi dituela. Maisuaren eta ikaslearen arteko harremanaz gain, errepliken arteko desberdintasunak ere aipatu ditu. Berasategiren esanetan, erreplikak ez dira inoiz perfektuak, eta desberdintasun horiei batzuetan akats esaten zaie, eta beste batzuetan, jenialtasun. Erreplika hitzak argudio bati emandako erantzuna ere esan nahi du.
Bakardadeak ere leku nabarmena du eleberrian. Egileak azaldu duenez, bakardadearen erromantizazioari buruzko hausnarketak ageri dira liburuan, gaur egungo gizartean indibidualismoa eta nartzisismoa elikatzen dituzten joerekin lotuta.
Bestalde, Berasategik adierazi du pertsonaiak ez direla guztiz berriak, irakurleari ezagunak egingo zaizkiola ziurrenik. Pertsonaia horien alderdi batzuk ezkutatu eta beste batzuk agerian uzteko jolasa egin duela azaldu du.
You may also like
