Ximun Fuchsek sortu eta zuzendu du obra, Solanoren bizitzatik eta esperientzietatik abiatuta, eta Sua Enparantza aktorearekin batera igoko da oholtzara. Proiektu berria Hernaniko Biteri Kultur Etxean aurkeztu dute gaur, sortzaileen parte-hartzearekin.
Milaka lagunen aurrean trikitia jotzen eta abesten aritzetik antzerkira egingo du jauzia Xabi Solanok. Oraingoan, baina, proposamen intimo batean parte hartuko du, ikusleak aktoreengandik oso gertu izango dituen formatuan. Oholtza gainean Solano, Susa Enparantza eta trikitia izango dira.
Aitaren Hauspoa da antzezlanaren izena eta familia baten barruko harremanak ditu abiapuntu. Kontakizunean herri baten historiarekin lotutako gaiak ere agertzen dira: fabrika, euskara, erromeria, frankismoaren ondorengo beldurrak, erbestea, militantzia, festa, lana, gizontasuna eta isiltasuna, besteak beste.
Belaunaldien arteko transmisioa ere lantzen du obrak, galdera baten bidez: zer jasotzen dugu aita batengandik, eta zer transmitituko diegu guk gure haurrei?
Fuchsek Solanoren bizipen pertsonalak hartu ditu fikzioa sortzeko abiapuntu, baina antzezlana ez da biografia bat, ezta bizipen horien erreprodukzio hutsa ere. Enparantzak, berriz, aktore, dantzari eta zirkuaren munduko artista gisa duen ibilbidea ekarri du proiektura.
Obra kutxa batekin hasten da, eta barruan trikitia dago. Musika tresna horren inguruan garatzen da kontakizuna, familia baten barruko harremanak, oroitzapenak eta belaunaldi batetik bestera transmititzen dena jorratuz.
You may also like
