Joseba Sarrionandia (argazkia: Kultur Sharea)

[Bideoa] Joseba Sarrionandiak esklabotzaren historia hartu du abiapuntu ‘Drapetomania’ eleberrian

1857an Afrikatik Ameriketara eramandako haur esklabotu baten bizipenak kontatzen ditu idazle bizkaitarraren lan berriak, hainbat pertsonaiaren ahotsen bidez. Pamielak argitaratu du liburua, Ares marrazkilari kubatarraren ilustrazioekin.

Joseba Sarrionandiak Drapetomania eleberria aurkeztu du Donostian, Pamiela argitaletxearen eskutik. XIX. mendeko esklabotza du ardatz lan berriak, eta bederatzi urte inguru zituela gatibatu eta 1857an Afrikatik Ameriketara eramandako haur baten ibilbidea kontatzen du.

Kultur Shareari eskainitako elkarrizketan, Sarrionandiak azaldu du haur esklabotu horren bizipenak ez ezik, garai hartako gizartearen funtzionamendua ere erakutsi nahi izan duela. Horretarako, hainbat pertsonaiaren kontakizunak erabili ditu, esklabotzaren inguruan antolatutako gizartean bakoitzak betetzen zuen lekua azaltzeko.

Eleberriaren izenburuak esklaboek ihes egiteko zuten nahiari egiten dio erreferentzia. XIX. mendearen erdialdean, esklabotzatik ihes egiteko gogoa gaixotasun mental gisa definitu zuten, eta drapetomania izena eman zioten. Sarrionandiak elkarrizketan azaldu duenez, plantazioetatik ihes egiten zuten pertsona esklabotuen jokabidea azaltzeko erabiltzen zuten kontzeptua, eta lan egiteko gogorik eza edo protesta egiteko joera ere haren sintomatzat hartzen zituzten.

Haur esklabotuaren kontakizunarekin batera, beste hainbat pertsonaiaren ahotsak bildu ditu idazleak. Horien artean daude Afrikako erregetxoak, esklaboak garraiatzen zituzten itsasontzietako kapitainak, Habanako kontsul britainiar abolizionistak, epaile kolonial bat eta ihes egindako esklaboen ehiztariak.

Egileak azaldu duenez, pertsonaia horien bidez gizartearen egitura eta haren barruko harremanak erakusten saiatu da. “Gizarte oro makinaria handi bat da”, adierazi du idazleak, eta haren esanetan, gizarte horretako kideek eginkizun desberdinak betetzen dituzte, elkarren artean harreman handirik izan gabe ere.

Liburuak Ares izenez ezaguna den Aristides Hernandez marrazkilari kubatarraren ilustrazioak ditu. Bi sortzaileek aurretik ere egin dute lan elkarrekin, besteak beste, Munduari bira eman zion ontzia liburuan.

Idazleak azaldu duenez, aurreko lan hartan memoria historikoa berreskuratzeko interesa izan zuten, eta Drapetomania eleberrian ere iraganeko gertakari bat hartu dute abiapuntu. Oraingoan, XIX. mendeko esklaboen trafikoa eta kolonietako esklabotza landu dituzte. Sarrionandiak gaineratu du ilustrazioetan garai historiko desberdinetako elementuak nahastu dituztela, anakronismoarekin jolastuz.

Iraganeko historia horren bidez, gaur egungo gizarteari buruz hausnartzeko aukera eskaini nahi du idazleak. Haren esanetan, testuaren eta marrazkien helburua “gaur egungo irakurleari gaur egungo gizarteaz pentsatzeko motiboak ematea” da.

Zabaldu:

Utzi erantzuna