Euskal Herriko Gazte Orkestraren 2026ko Udako Topaketa martxan da. Uztailaren 16ra arte egingo duen biran, Juan Crisostomo Arriagaren heriotzaren bigarren mendeurrena omenduko du, Gustav Mahlerren 5. Sinfoniarekin batera. Hondarribia, Azkoitia, Donostia, Bilbo eta Gasteiz izango dira emanaldien agertokiak.
Euskal Herriko Gazte Orkestrak (EGO) martxan du jada 2026ko Udako Topaketa, urteko hitzordu artistiko eta prestakuntza garrantzitsuenetako bat. Uztailaren 6an hasi zituzten entseguak, eta igandean abiatu zuten bost kontzertuz osatutako bira. Uztailaren 16ra bitartean, Hondarribia, Azkoitia, Donostia, Bilbo eta Gasteiz bisitatuko dituzte, aurtengo egitarau sinfonikoarekin.
Ruben Gimeno zuzendari artistikoaren gidaritzapean, EGOk Unai Urrecho izango du zuzendari gonbidatu. Orkestrarentzat itzulera berezia da, Urrecho gaztetan EGOko kide izan baitzen eta, ondoren, Europa, Amerika eta Asiako orkestra nagusietan tronboi-jotzaile gisa ibilbide nabarmena egin ostean, oraingoan zuzendari gisa itzuli baita.
Aurtengo programaren ardatz nagusietako bat Juan Crisostomo Arriagaren heriotzaren bigarren mendeurrenari egindako omenaldia da. Bilbon 1806an jaio eta 1826an Parisen hil zen konpositorearen Los esclavos felices obraren obertura interpretatzen ari da EGO, euskal musikaren historian funtsezko figura izan zen sortzailearen ondarea gogora ekarriz. Obra horrek, gainera, esanahi berezia hartu du 2026 honetan, Arriaga hil zenetik 200 urte bete baitira.
Egitaraua
Kontzertuen egitaraua herriaren arabera aldatu egiten da. Hondarribian eta Azkoitian, Arriagaren oberturaz gain, Felix Mendelssohnen Konzertstücke biak, Gustav Mahlerren 5. Sinfoniako Adagietto eta Georges Bizeten Carmen obrako lehen suitea eskaintzen ari dira. Kontzertu horietan Silvia Ferro eta Oihan Espina klarinete-jotzaileek parte hartzen dute bakarlari gisa; biak ala biak EGOko kide ohiak dira.
Donostian, Bilbon eta Gasteizen, berriz, egitarau sinfonikoak Arriagaren Los esclavos felices eta Gustav Mahlerren 5. Sinfonia uztartzen ditu. Azken hori errepertorio sinfonikoko lanik ezagun eta hunkigarrienetako bat da, eta bere Adagietto ospetsua ere entzun ahal izango da.
Udako Topaketek prestakuntza-dimentsio sendoa ere badute. Aurten, nazioarteko orkestra entzutetsuekin lotura duten irakasleek gidatzen dituzte saioak; tartean, Berliner Philharmoniker, Royal Concertgebouw Amsterdam, London Symphony Orchestra, Gewandhausorchester Leipzig, Orchestre National de France eta Luxemburgo Filarmonikako musikariak. Horri esker, parte hartzen duten gazteek maila goreneko profesionalekin lan egiteko aukera dute, nazioarteko estandarretatik oso hurbil dagoen orkestra-esperientzia biziz.
Ana Lopez Eusko Jaurlaritzako Kultura Sustatzeko eta Kultura eta Sormen Industrien zuzendariak azpimarratu du EGO “talentu gaztearekiko dugun konpromisoaren adierazpenik onenetakoa” dela. Bere esanetan, Udako Topaketek bikaintasuna, prestakuntza eta bokazio publikoa uztartzen dituzte, eta musika sinfonikoa herritarrengana hurbiltzeko aukera eskaintzen dute.
Ildo beretik mintzatu da German Ormazabal EGOko koordinatzaile nagusia ere. Haren hitzetan, topaketek “ikaskuntza zorrotzerako, musika-bizikidetzarako eta orkestra-praktikarekin benetako kontaktua izateko espazioa” eskaintzen dute, prestakuntza artistikoa eta belaunaldien arteko harremana uztartuz.
2026ko edizioak, gainera, orkestraren lurralde-bokazioa indartzen jarraitzen du. Uztailaren 16ra arte egingo den biraren bidez, EGOren lana Euskal Herriko bost hiritara iritsiko da. Horrela, gazte musikarien prestakuntza eta kalitatezko musika sinfonikoa publiko zabalari hurbiltzeko helburuari eusten dio Euskal Herriko Gazte Orkestrak.