‘Ez dok ero’ antzezlana estreinatuko du Tartean Teatroak azaroan, Bilboko Arriagan

“Euskal Antzerkiaren road movie eroa dugu Ez dok ero antzezlana, euskal kultura, euskal antzerkia eta euskal gizartearen irudi deformatua, barregarria eta aluzinatua eskeintzen duena”.

Tartean Teatroak berak sortu eta ekoiztutako antzezlana da Ez dok ero, “etxean” egindakoa, adierazi dute gaur bidalitako oharrean. Testuaren egilea Patxo Telleria dugu eta zuzendaritza lanetan Jokin Oregi aritu da. Aktoreak EzDok3 bikote artistikoa osatzen duten Mikel Martinez eta Telleria bera dira. Jatorrizko musikaren konposaketaz Adrian Garcia de los Ojos arduratu da.

Hala, Telleriak eta Martinezek osatzen duten EzDok3-ren lan guztietan bezala, ikuskizun honetan ere euskara eta euskal kultura dira protagonista nagusiak. Are gehiago oraingoan, non gure imaginario kolektiboak eta kultur sinbologiak presentzia nabarmena duten. Tartean Teatroak azaldu duenez, “Euskal Antzerkiaren road movie eroa dugu Ez dok ero antzezlana, euskal kultura, euskal antzerkia eta euskal gizartearen irudi deformatua, barregarria eta aluzinatua eskeintzen duena”.

Obra Mikelote eta Pantxo bikote artistikoaren desagerpenarekin abiatzen da. Haien formula komikoa gastatua zegoen, eta belaunaldi berriek haien tokia okupatu dute. Pantxok ondo hartu du behartutako erretiroa. Agertokietatik urruntzeko gogoa zuen aspalditik, bizimodu lasai eta normalizatua desiratzen zuen, artearen eromenetik urrun. Mikelotek, berriz, ez du bukaera onartu nahi. Antzerkiaren pozoia sakon errotuta dago bere zainetan. Eta pozoi horrek burua galtzeraino eramango du.

Egun batean Mikelote, “antzerkilari andante” estrafalarioa, Pantxoren bila joango da, trasteak prestatu eta Euskal Herrian barna joateko, herriz herri antzeztera, “Euskal Antzerkiak Behar Gaitu” uste inozoarekin.
Horrela ibilbide fantastiko bat egingo dute Euskal Herrian zehar, hamaika abentura ero biziz. Mikeloteren imajinazioak sorturiko pertsonaia harrigarriak ezagutu eta egoera korapilatsuetan endredatuko dira.

Datorren urriaren 5ean, lantaldea Basauriko Social Antzokian sartuko da hilabeteko egonaldi artistikoa egiteko asmoz. “Sortze prozesua uda aurretik hasi bazen ere, oraingo egonaldi honi esker, forma eta esanahia emango diogu proiektu berriari”. Hau dela eta, Basauriko antzokia ikuskizun honen koproduktorea izango da.

Obraren estreinaldia berriz, azaroaren 10ean eta 11n izango da Bilboko Arriaga antzokian.

Ondorengo emanaldien datak ikusteko hemen.

Zabaldu: