Jaialdiaren helburua Hondarribia udako jazz zirkuituan sartzea da. Horretarako, antolatzaileeek “apustu serioa” egin dute goi mailako musikarien alde, hala nola Judith Hill, ksenia Parkhatskaya, Caco Senante, Takiya Kuroda edo Carmen Souza.
Hondarribian Jazz Nazioarteko Jaialdiak bigarren edizioa izango du gaurtik hilaren 16ra bitartean herriko hainbat tokitan, batez ere herrigune historikoko plazetan.
Antolatzaileen esanetan, “kalitateagatik eta ukitu desberdinagatik nabarmentzen diren jarduerak antolatzeko bidea egiten jarraitu nahi dugu. Alde horretatik, uztailaren 10etik 16ra bitartean doako emanaldiak eskainiko ditugu Kasino Zaharreko lorategietan jarriko dugun karpan, Arma Plazan, Apezpiku Plazan eta Erreginaren Baluartean”. Iaz egin zuten bezala, Gipuzkoa plaza Women In Hondarribian Jazz izango da, emakumeen kontzertuei eta jazzaren zabalkundeari, sustapenari eta garapenari eskainitako gunea. Bestalde, ordainpeko kontzertuak Itsas Etxea Auditoriumean izango dira. Helburua Hondarribia udako jazz zirkuituan sartzea dela nabarmendu du antolakuntzak.
Joseba Cabezas Hondarribian Jazzeko zuzendariak egitarauaren berri eman du, “Hondarribia, Getxo, Gasteiz eta Donostiako jazz jaialdiaren zirkuituan egon nahi dugu. Horretarako, oso apustu serioa egin dugu goi mailako musikarien alde, hala nola Judith Hill, ksenia Parkhatskaya, Caco Senante, Takiya Kuroda edo Carmen Souza”.
Itsas Etxea Auditoriumak nazioarteko artistak hartuko ditu, eguneko bi kontzerturekin. Horrez gain, FamiliJazz gunea ere egongo da, haurrak dituzten familientzako bi kontzerturekin.
Cabezasek aipamen berezia egin dio Agustiña Genua Saralegi plazan, Denda kalean, antolatu duten familia zinemari.
Bestalde, Kasino Zaharreko lorategietan karpa bat jarriko dutela iragarri dute, bi helburu nagusirekin: “20:00etatik aurrera erreferentzia puntu bihurtzea tragoren bat hartzeko eta musika entzuteko, ekitaldi desberdinekin gauerdia pasa arte. Bigarren helburua eguraldi txarrik gabeko edizioa bermatzea da; izan ere, karpan eramango ditugu zirkuituko kontzertuak eta aurreikusitako jarduerak, euria edo eguraldi txarra egingo balu”.
Azken egunean, uztailaren 16an, jaialdiari amaiera emateko, eguerditik aurrera Bokale Brass Band taldeak Hondarribiako kaleak zeharkatuko ditu kalejiran, Louisianako ekitaldi sozialen desfile tipikoetan inspiratua. “Bokale Brass Band energia eta dibertsio hutsa da, publikoari etengabe dantza eginaraziko diona” amaitu du Cabezasek.