Guztira 23.000 euro jasoko dituzte, antzezlana bekaren oinarrietan zehaztutako baldintzen arabera sortzeko eta ekoizteko. Sormen prozesuan Dinamoa Sormen Gunea erabiltzeko aukera ere izango du taldeak. Antzezlana, berriz, 2022ko Azpeitiko Euskal Antzerki Topaketetan estreinatuko da.
UEMAk, Eusko Jaurlaritzak eta Nafarroako Gobernuak elkarrekin abiarazitako Arnasa gara kanpainaren baitan, Arnasguneak antzerki sorkuntzarako beka sortu dute aurten, antzezlan baten bidez arnasguneen garrantzia jendarteratzeko asmoz. Aurkeztu diren bederatzi egitasmoak aztertu ondoren, epaimahaiak Lesakako Mairu Antzerki Tailerraren Intxaurra proiektuari ematea erabaki du. Guztira 23.000 euro jasoko dituzte, antzezlana bekaren oinarrietan zehaztutako baldintzen arabera sortzeko eta ekoizteko. Sormen prozesuan Dinamoa Sormen Gunea erabiltzeko aukera ere izango du taldeak. Antzezlana, berriz, 2022ko Azpeitiko Euskal Antzerki Topaketetan estreinatuko dute.
Manex Fusch izango da antzezlanaren zuzendaria, eta inguratzen gaituen ekosistemak gugan duen eragina islatuko du taldeak, Gaizka Sarasolak idatzitako testuan oinarrituta. Aktoreak, berriz, Ainara Ribera, Gaizka Sarasola, Iban Garro, Josune Etxepare Juanen Saralegi eta Ritxi Abril izango dira. Horietaz gain, Ibai Gogortzak (soinu diseinua), Andoni Mendizabalek (argi diseinua), Eduardo Condek (atrezzoa eta eszenografia) eta Martxel Rodriguezek (ekoizpena) osatuko dute taldea.
Lantaldeak gaixorik dagoen Terexaren istorioaren bidez islatuko du deialdiak eskatutakoa: arnasguneen garrantzia. Horretara heltzeko, ordea, inguruneak herriengan, hizkuntzengan eta jendearengana duen eragina islatzeko modua erabiliko dute Intxaurra antzezlanarekin.
Taldeak proiektuaren laburpenean adierazi duenez, “Terexa gaixorik dago, baina ez bera ez du bere osasun egoerak arduratzen. Etxeko intxaurrondoaren osasunak kezkatzen du. Intxaurrondoak ere gaitza badu. Onddoren batek kalte egiten dio, eta fruituak, kanpoko azal eta guzi erortzen dira lurrera. Azalak intxaurrak ito eta usteltzen ditu. Terexak ez du sendagaiarekin asmatzen. Larritasunak, gaixotasunarekin batera, Terexa itotzen du. Gero eta nekezagoa zaio arnasa hartzea. Terexaren sentimenduen eta emozioen bidez, inguratzen gaituen ekosistemak, inguratzen gaituzten baldintzek, guregan duten eragina azaleraztea da antzezlanaren asmoa. Inguruko baldintzek eta ezaugarriek eragiten dutelako herriengan, hizkuntzengan, jendearengan… inguratzen duten lurrek landareengan eragiten duten moduan”.
Kalitate handiko hainbat egitasmo
Mairu Antzerki Tailerraren Intxaurra saritzeaz gain, epaimahaiak berariaz nabarmendu nahi izan du Arnasguneak antzerki sorkuntzarako deialdi honetan jasotako proposamen gehienen kalitatea eta garrantzia. Zehazki, esku artean “kalitate handiko hainbat egitasmo interesgarri” izan dituela aipatu du epaimahaiak, eta “ez da erraza izan erabakia hartzea. Baina ez non aukeraturik ez zegoelako. Kontrakoa: ezinbestean lan bakar bat saritzera behartuta, interes handiko beste zenbait lan bidean geratu dira”.
Beka jasoko duen egitasmoa aurkezteko agerraldia urtarrilaren erdialdera egingo dute bekaren antolatzaileek, Mairu Antzerki Taldeko kideekin batera.