Liburua bi zatitan banatuta dago: gramatika eta hiztegia. Gramatikaren atalean bertako euskararen egitura jasotzen da.
2013tik 2017ra bitartean, Saran lanean aritu ondoren, Nafarroa Beherean egon da Koldo Zuazo 2018tik 2020ra bitartean. Azken egonaldi horren emaitza Baigorri eta Ortzaize ibarretako euskara (EHU) izeneko liburuan jaso du. Hizkuntzalari eibartarrak Baigorri eta Ortzaize ibarretako euskara izan du aztergai. Nafarroa Behereko hego-mendebalean daude bi ibar horiek, eta hamaika herri dira bertan.
Liburua bi zatitan banatuta dago: gramatika eta hiztegia. Gramatikaren atalean bertako euskararen egitura jasotzen da, oinarrizko gertakariak. Hiztegia, berriz, oso zabala da: 4.625 sarrera, 934 azpisarrera, 75 esamolde eta 35 esaera eta esaera zahar biltzen ditu denetara. Azken batean, gaur egun Nafarroa Beherean egiten den euskara ezagutzeko bitarteko egokia.
Zuazok mota honetako beste liburu batzuk ere ekarri izan ditu plazara: Deba ibarreko euskara (Badihardugu Euskara Elkartea, 2006), Sakanako euskara. Burundako hizkera (Euskaltzaindia, 2010), Arabako euskara (Elkar, 2012), Mailopeko euskara (EHU, 2013), Sarako euskara (EHU, 2018) eta, Urtzi Goitiarekin batera, Uribe Kosta, Txorierri eta Mungialdeko euskara (EHU, 2016). Mendebaleko euskara liburuan (Elkar, 2017) Arabako, Bizkaiko eta Gipuzkoako Deba ibarreko euskara erakutsi zuen, eta gaur egungo euskalkien ikuspegi orokorra agertu du beste bi liburu hauetan: The Dialects of Basque (University of Nevada, 2013) eta Euskalkiak (Elkar, 2014).
Euskara batua ere izan du aztergai hizkuntzalariak: Euskararen batasuna (Euskaltzaindia, 1988), haren doktore tesia, eta Euskara batua. Ezina ekinez egina (Elkar, 2005). Bi gai horiek, euskalkiak eta euskara estandarra, eman ditu ezagutzera Routledge argitaletxeak argitaratutako Standard Basque and Its Dialects liburuan (2019).