Abestiak XX. mendearen erdialdean Goierritik Ternuara bakailao-arrantzara joandakoen bizipenak ditu hizpide. Taldearen estudioko seigarren diskoak laster ikusiko du argia.
McOnak taldeak Antzar bat abestia argitaratu du, laster kaleratuko duen Traganarrua diskoaren lehen aurrerapena. Kantuan gerraosteko miseria, sorterriarekiko herrimina eta bakailao-ontzietako lan-baldintza gogorrak jorratu ditu taldeak.
Abestiak XX. mendearen erdialdean Gipuzkoako Goierritik Ternuara bakailaoa arrantzatzera joan ziren herritarren istorioak berreskuratzen ditu. Goierritik urrun joan behar izan zuten arrantzaleen bizipenak kontatzeko, garaiko errealitate historikoarekiko fideltasuna zaindu duela azaldu du taldeak.
Kontakizun historikoa erritmo bizi eta indartsuekin uztartu du McOnakek. Abesteko eta dantzatzeko proposamen musikalaren bidez, arrantzale haien bizipenak eta memoria kolektiboa ekarri ditu kantura. Taldearen esanetan, Antzar bat bere musika egiteko moduaren erakusgarri da, istorioak kontatzeko eta sustraiei begiratzeko joera erritmo dantzagarriekin lotzen baititu.
2011n Lekeition sortutako taldeak folk-rocka landu du bere ibilbidean, Irlandako musika tradizionalaren, rockaren eta punkaren eraginak uztartuz. Itsasoarekin lotutako istorioak ere agertu izan dira haren aurreko lanetan, besteak beste Bitakora diskoan.
Kantu berriak Traganarrua diskoaren unibertso narratibo eta musikala aurkezten du. Taldearen estudioko seigarren lana izango da, eta McOnakek iragarri duenez, lehen aurrerapenean erakutsitako norabidean sakonduko du disko berriak.
