Idazlearen lehen poema liburua da Zoonomia eta Pamiela argitaletxearekin emango du argitara.
Nerea Arrien idazle lekeitiarrak Xabier Lete Nazioarteko VI. Poesia Saria jaso du Donostiako Koldo Mitxelena Kulturunean egin den ekitaldian. Idazleak lehiaketaren seigarren edizioa irabazi du, Zoonomia izeneko euskarazko lanari esker. Sari hori irabazi duen lehen emakumea da Arrien.
Epaimahaiaren hitzetan, Zoonomia “atseginez, dibertimenduz eta plazerrez irakurtzen den poema liburua da, tematikaren garapenak dinamika erakargarria duelako, eta estiloak naturaltasun eta edertasun minimalista. Gaiari dagokionez, emazte/ama gaztearen hausnarketa ezberdinei ematen die bide, tartean kontziliazioa eta etxeko lanen partekatzearen auziari”.
Sei ataleko egituran zehar, “maitasunaren eta desioaren, gizon eta emakumeen erreturekin batera, familiaren eta haur haztearen nahiz eguneroko bizitzaren auziak jorratzen ditu ingenio, ironia eta umore finez, baina baita sakontasunez ere, liburuan oinazea, ukitu tragikoa eta benetakotasuna nabariak dira”.
Poetak animaliak bere barneko emozioen adierazpide bilakatzen dituela ere nabarmendu du epaimahaiak, bestiario pertsonal bat osatzeraino, “tradizioaren, zientziaren, esperientzia kulturalaren eta hausnarketa pertsonalaren emaitza bihurtuz. Liburuaren gaiaren adierazpidea da piztiarioa, hortaz, eta bere hezur arteko zootik ateratzen den emea agertzea du xede nagusi”.
Arrienen lehen liburua, Pentsatzeko txokoa izenekoa, Lizardi saria irabazi ondoren argitaratu zen. Haur eta gazte literaturan Atrapa eguna, Eskola hodeian eta Etxegabetuak izenburuek eman dute argitara. Helduentzako narratiban Hirutter eleberria Jende Likidoa kaleratu ditu.
Harkaitz Millan Kultura diputatuak eman dio saria idazleari, bere hitzetan, “Xabier Leteren poesiak esanahi berezia du euskaldun askorentzat, bere ibilbidea belaunaldi oso batenarekin bat etorri baitzen: “Sari hau Xabier Letek euskarazko poesia belaunaldi oso batera hurbiltzeko egindako lanaren aintzatespena da”. Millanek ere nabarmendu nahi izan du poetaren dedikazioa, “humanismoan eta balioen defentsan oinarritutako euskal identitatea eraikitzeko”.
Arrienekin batera, Garazi Navas akordeoilariak eta hainbat epaimahaikidek ere hartu dute parte ekitaldian. Jose Luis Padronek gidatu du ekitaldia.