Paula Hoyosek gaztelaniazko lan onenaren saria eskuratu du. Malen Onandia eta Ines Sanchezen testuak, bestalde, haurrentzako Txiki Baskardo kontakizun lehiaketan saritu dituzte.
Getxo Kulturak eta Pinillesca kolektiboak Ramiro Pinilla Eleberri Laburren Lehiaketaren zortzigarren edizioaren irabazleak ezagutzera eman dituzte. Nerea Baldak euskarazko lan onenaren saria eskuratu du eta Paula Hoyosek gaztelaniazkoarena. Horretaz gain, Malen Onandia eta Ines Sanchez bertako ikasle gazteak saritu dituzte Txiki Baskardo haurrentzako kontakizunen lehiaketan, euskarazko eta gaztelaniazko modalitateetan, hurrenez hurren.
Nerea Baldak (Irurtzun, 1975)Zure arnasa zaintzeko eleberriarekin irabazi du saria. Istorio honen bitartez, egileak familia baten unibertsora ez ezik, ezaguna den unibertso batera ere lekualdatzen du publikoa, estilo garden, sentikor, sinesgarri eta umoretsu batekin, pertsonaiekiko enpatia sortzeko gai dena, amaren eta alabaren arteko harreman konplexuak eta nerabezaro hain konplexuaren gorabeherak ulertzeko eta adierazteko gaitasun handia duena.
Balda Euskal Filologian lizentziaduna da eta Altsasu BHIko euskara irakaslea. Nafarrak hirugarren aldiz irabazi du lehiaketa hau; izan ere, 2018an Atzerrian eleberriarekin lehen edizioko saria eskuratu zuen eta 2022an gauza bera egin zuen Azpimarrak lanarekin. 2022. urtean ere Iruñeko Udalak bultzatutako Euskarazko Sortzaile Berrien Lehiaketan irabazle izan zen.
Paula Hoyosek (Aguilar de Campo, 1992) gaztelaniazko eleberri onenaren saria eskuratu du Dormir fuera de casa lanarekin, estilo zehatz eta ia dokumentalista duen kontakizun koralarekin. Egileak, bere istorioan, nahigabe eta gogaituta dagoen gizarte baten norabiderik ezari heltzen dio, atzeratutako hegaldian eta abiatzen ez diren bizitzetan bat egiten duten pertsonaien barruan sakonki sartuz, non ia bidaiari gisa ibiltzen diren.
Zortzigarren edizioa
Ramiro Pinilla Eleberri Laburren Lehiaketaren edizio honetako parte-hartzeak emaitza onak izan dituela nabarmendu du antolakuntzak. Guztira, 217 lan jaso dituzte eta aurkeztutako testuak, ohi bezala, jatorri askotarikoak izan dira. Ohi bezala, irabazleek 6.300 euroko saria jasoko dute. Halaber, euskarazko eleberria Erein argitaletxeak argitaratuko du.