Plataformak 5.559 film eta telesail eskaintzen ditu Hego Euskal Herrian. Gaur egun euskaraz dauden bakarrak Handia, Errementari eta Black is Beltza filmak dira. Ikus-entzunezkoak galegoz eta katalanez ere azpititulatuko dituela iragarri du Netflixek.
Euskara, galegoa eta katalanaren presentzia sustatzeko asmoz, Netflix plataformak nazioarteko hainbat telesail eta film azpititulatu eta haur eta familientzako hainbat lan bikoiztuko ditu hiru hizkuntza horietan. Netflixek zehaztu duenez, plataforman eskuragarri dauden heinean argitaratuko dira lanak. Hala, datozen hilabeteetan eta urte amaierara arte, euskarazko 70 ikus-entzunezko inguru biltzen dituen zerrenda bat egongo da plataforman eskuragarri. Gainera, Netflixek iragarri duenez, urtero lan berriak gehituko dira zerrendara.
Plataforma estatubatuarrak zehaztu duenez, nazioarteko film eta telesailen 600 ordu azpititulatuko ditu guztira, bai eta hiru hizkuntzetara bikoiztutako haur eta familientzako lanen 60 bat ordu ere. Plataformak 5.559 film eta telesail eskaintzen ditu Hego Euskal Herrian eta gaur egun euskaraz dauden bakarrak Handia, Errementari eta Black is Beltza filmak dira. Hala, harpidedunek aukera izango dute telesailak euskaraz, galegoz eta katalanez ikusteko. Horien artean daude, besteak beste: Emily Parisen, The Mother, Garra, Sandman eta Pinocho.
Plataformarentzat hiru hizkuntza hauen presentzia sustatzea beste urrats bat da, “Ikus-entzunezko horiek aurten jarriko ditugu eskuragarri, eta datozen urteetan eskaintza handitzea da asmoa”. Plataformak berak hartuko du bikoizketa eta azpititulu horiek ordaintzeko ardura.