Batera, bagara, bat gara lelopean aurkeztu dute aurtengo edizioa eta “ezberdina baina betiko helburuei atxikia” izango dela adierazi dute.
Covid-19ak eragindako pandemiak ikastolen aldeko jaiak ere gogor astindu dituen arren, Gipuzkoako ikastolen aldeko Kilometroak jaia birpentsatu eta egunaz harago doan eskaintza plazaratu dute Beasain, Lazkao eta Ordiziako Andramendi, San Benito eta Jakintza ikastolek aurtengo ekitaldirako. Batera, bagara, bat gara lelopean aurkeztu dute aurtengo edizioa eta “ezberdina baina betiko helburuei atxikia” izango dela adierazi dute.
Hala, jai ereduari buruz egindako hausnarketaren ildotik, egun bakarreko egitaraua egin beharrean, iraila eta urrian egingo dira ekimenak urriaren 3ko ekitaldi nagusian edukiera mugatua izango delako. “Guztiongan pentsatutako jaia izango da. Hori bai, bereziki goierritarrei egindako deia da. Ekitaldiak irekiak dira, noski. Parte-hartzea Ikastola komunitateaz gaindi izatea nahi dugu. Herriari eskainitako festa da, gozatzekoa”, azaldu du antolakuntzak.
Hiru bloke izango ditu aurtengo Kilometroak jaiak. Abiapuntua Kilometroak bidea erakusketa ibiltaria izango da, 1977tik gaur egunera arte egin diren ekitaldien bilakaera biltzen duena. Irailaren 13tik 17ra Ordiziako Barrena Jauregian izango da ikusgai; irailaren 20tik 24ra, berriz, Beasainen eta, azkenik, Lazkaoko Udalaren aretoan, irailaren 27tik urriaren 1era.
Era berea, herrietako eragileekin elkarlanean antolatuta bertsolariak, musikariak eta dantzariak uztartuko dituen bertso saio bana egingo da: Lazkaon irailaren 17an, Beasainen irailaren 24an eta Ordizian urriaren 1ean. Hiruetarako izen-ematea nahitaezkoa izango da. “Izan ere, osasun egoera dela-eta, ezarritako neurri guztiak betez antolatuko dira ekimenak parte-hartzaile guztien segurtasuna bermatzeko. Egunean bertan ezingo da sarrerarik erosi”.
“Gogoetarako tartea ere izango da, zer hezkuntza sistema nahi dugun aurkeztu eta partekatzekoa”, nabarmendu dute. Bihar endekalogoaren oinarriak aztertzeko foro bana egingo dute ikastola antolatzaile bakoitzean. Irailaren 30ean izango da hori, eta foro bakoitzean oinarri bat landuko dute.
Kilometroak jaiaren asteburuko larunbatean, urriaren 2an, berriz, herri bakoitzean ikuskizun bana antolatuko da. Ekirock eta Euskal Joko eta Kirolak izango dira Ordizian; Haatik dantza konpainiaren ikuskizuna Beasainen, eta Eneko Dorronsoro eta Fredi Pelaez musikarien kontzertua Lazkaon.
Urriaren 3an, Kilometroak jaiaren egunean, bereziki haur eta gazteei bideratutako ekitaldiak egingo dira, Goierriko hiru herri horietako bost espaziotan. Hiru Ordizian izango dira, nagusia Jakintza Ikastolan eta Barrena parkean eta Oiangun. Lehen Hezkuntzako ikasleei eta DBHko gazteei zuzendutako ekimenak izango dira. Beasainen, Igartzan eta inguruetan, Haur Hezkuntza eta LHko lehen eta bigarren mailako haurren txokoa antolatuko dute, eta Lazkaon LHko bosgarren eta seigarren mailakoentzako espazioa antolatuko dute. “Xumea, baina oso berezia izango da jaia. Eta, noski, edukiera mugatuekin eta aurretiazko izen-ematearekin”, bukatu dute.