Pieza Huarte familiaren Kale Nagusiko etxebizitzan zegoen.
Iruñeko Kondestablearen jauregian balio historiko eta artistiko handiko pieza berri bat jarri dute. Hiriaren armarria irudikatzen duen XVI. mendeko harrian egindako eskultura-multzoa da. Pieza hori Kale Nagusiko etxebizitza batean zegoen eta Udalak erosi du, multzoaren ondare-balioa baieztatzen duen azterketa bat egin ondoren.
Inauguratu berri den pieza Iruñeko armarriaren heraldika-landu bat da, XVI. mendeko bigarren erdikoa. Pieza, hirian hezkuntza-esparruari oso lotuta dagoen Huarte familiarena zen eta Kale Nagusiko etxebizitza bateko beheko solairuan zegoen kokatuta. Eraikina eta bertako ondasun guztiak salgai jartzean, familiak administrazio publikora jo zuen, ondare-balioa zuen piezaren bat haren interesekoa izan ote zitekeen jakiteko. Udalak, armarriaren garrantzi berezia egiaztatu ondoren, pieza erosi zuen Kondestablen jartzeko.
Izan ere, Kondestablearen jauregia armarriaren garaikoa da, biak XVI. mendekoak baitira. Gainera, udaletxearen aurreko eraikina eraikitzen ari ziren bitartean, XVIII. mendearen erdialdean (gaur egungo fatxada barrokoa kontserbatzen da), Udalak jauregian izan zuen egoitza, eta horrek testuinguruan jartzen du pieza hori udaletxe gisa erabili zen eraikin
Berariazko txostena
Eskultura-multzoa Udaleko eta Nafarroako Gobernuko teknikariez gain, Artearen Historian doktore den eta Nafarroako Unibertsitateko Nafarroako Ondare eta Arte Katedrarekin lotura duen Alejandro Arandak ere baloratu zuen. Bere txostenean, historialariak multzoaren balio artistiko berezia nabarmentzen du, hala diseinuan nola gauzatzeko orduan. Balio historikoari dagokionez, are handiagoa da, XVI. mendeko Iruñeko armarrien irudikapenak urriak baitira, eta, zehazki, ez da horrelako harrizko tailurik kontserbatzen, armarri-mota horiek ez baitute horiei eusten zieten eraikinek baino gehiago irauten.