Mugarri honek indartu egiten du Medialab Tabakalerak bere katalogoa modernizatzeko eta datu ireki eta egituratuen aldeko apustua sendotzeko duen estrategia.
Tabakalerak beste urrats garrantzitsu bat eman du kultura-arloko ezagutza irekiaren alde: Medialab katalogoa eta Wikidata —Wikipedia elikatzen duen datu-base libre eta kolaboratiboa— konektatu ditu. Honi esker, Kultura Garaikidearen Nazioarteko Zentroaren ekosistemako sortzaileek, egileek eta eragileek ikusgarritasun handiagoa izango dute mundu mailan, informazioa eskuragarriago eginez.
Integrazio hau WikiInfo tresnaren bidez gauzatu da. Tresna honek katalogoko erregistroak Wikidatarekin lotzen ditu automatikoki, fitxa bibliografikoak datu ireki eta eguneratuekin osatuz. Horrela, erabiltzaileak informazio-koadro zabal bat aurkituko du fitxa bakoitzean: datu biografikoak, irudiak, kanpoko iturrietarako estekak eta Wikipediako artikuluak.
Gainera, plataforma eleanitza denez (euskara, gaztelania eta ingelesa), edukien irismen globala nabarmen zabaltzen da.
Gaur egun, Medialab katalogoak dituen 86.362 erregistroetatik 25.867 lotuta daude jada Wikidatarekin, testuinguru kultural eta biografiko sakonagoa eskainiz.
Etengabe berritzen den ekosistema
WikiInfo tresnak zubi-lana egiten du Tabakaleraren tokiko katalogoaren eta datu irekien munduaren artean. Lankidetza honen abantaila nagusia eguneraketa automatikoa da: erakunderen batek Wikidatako erregistro bat hobetzen badu, aldaketa hori berehala islatzen da Medialaben. Horrela, katalogoa sistema estatiko bat izatetik ingurune bizi eta kolaboratibo bat izatera igaro da.
Mugarri honekin, Medialab Tabakalera eraldaketa digitalaren abangoardian kokatu da, gardentasunaren, berrikuntzaren eta ezagutza kolektiboaren aldeko apustua berretsiz. Prozesu honetan guztian, Tabakalerak Euskal Wikilarien Kultur Elkartearen laguntza izan du.