Idazle gasteiztarrak azken urteetan ingurura begiratzeak sortu dizkion zenbait emozio eta hausnarketa bildu ditu lan berezi honetan: apunteak, ametsak, oroitzapenak, hausnarketak, pasadizoak.
“Behin entzun nion amumari hobe dela harrizko bihotz bat izatea, munduko minetatik babestuta egoteko. Bizitza errazagoa litzatekeela gehiegi sentitzen ez duen bihotz batekin, mundu hau blindatutako bihotzentzat pentsatuta baitago. Ordutik askotan egin dut amets harrizko bihotza izatearekin, babestuago egoteko, baina, ingurura begiratzen dudanean, ezinbestez pizten zait barruan emozioa. Eta halakoetan, taupada sentitzen dudanean, sentitutakoa kontatzeko beharra izaten dut, idaztekoa”, azaltzen du Karmele Jaiok argitaratu berri duen liburuaren hitzaurrean.
Idazle gasteiztarrak, beraz, azken urteetan ingurura begiratzeak sortu dizkion zenbait emozio eta hausnarketa bildu nahi izan ditu Harrizko bihotza, taupaden alfabeto bat izenburua duen lan berezi honetan: apunteak, ametsak, oroitzapenak, hausnarketak, pasadizoak… denak alfabeto moduan antolatu ditu liburuan, “hiztegi bat izango balitz bezala”.
Liburuaren gaiei dagokienez, Jaioren fikziozko lanetan landutako gaietako asko ageri dira bertan: giza harremanak, isiluneen pisua, adiskideak, haur garaiko kontuak… Horiekin batera, baina, etxeko leihoa ispilu bihurtu balitz bezala, barrura ere so egiten du Karmelek, eta bere buruaren erretratu antzeko bat eskaintzen du, sotila eta intimoa.
You may also like
