Oroitzapenetan iltzatuta dauden tokiei buruzko poema liburua ondu du Castillo Suarezek

Posted on 2023-02-17 by KulturSharea

Idazle altsasuarrak Donostian aurkeztu du gaur Alaska poema liburua.

Tokiei dolua egiteko beharretik sortu da Castillo Suarez idazleak (Altsasu, 1976) idatzi berri duen Alaska poema liburua. Gaur aurkeztu du lana Donostian, Elkar argitaletxearen eskutik. “Liburu honen abiapuntua Maddi Barberren esaldi bat izan zen, berak bere buruari galdetzen zion nola egiten zaien tokiei dolua. Hortik abiatuta nire haurtzaroarekin zerikusia daukan paraje bat hautatu dut, kasu honetan Alaska hotela”.

Alaska garai batean Altsasun egon zen jatetxe bat izan zen, bidaiariz eta turistaz betea egoten zena, Bernardo Atxagak bere liburuetako batean aipatu zuena. Amerikak bere ipar muturrean Siberiarekin bat egiten duen lurralde hotz hartan egin zuen jabeak nahikoa diru jatetxe hura muntatu eta, ondoren, Etzegaraten hotel handi eta elegante bat egiteko, igerilekua zuena, eta gaur egun abandonatuta dagoena.

Egileak azaldu duenez, “gure oroitzapenetan iltzatuta dauden tokien eta gure artean dagoen harreman horri buruzko bidaia bat egiten dut poemen bitartez eta desagertzen diren tokiek uzten diguten hutsuneari buruz, bizitzak beste gauza batzuekin betetzen dituenak, zorionez”.

Liburuaren egiturari dagokionez, Suarezek dio berezia dela, “nire orain arteko liburuak poema liburu klasikoak izan dira, baina, kasu honetan, sarrera narratibo bat egitea beharrezkoa iruditu zait, eta hor emakume baten istorioa kontatzea, bere puskak biltzen ari den emakume bat, bere etxea uzten ari dena eta amets egiten duena bere haurtzaroko paraje batekin, Alaska hotelarekin, hain zuzen. Protagonista haur zenean, bertan lan egiten zuen zerbitzari ilegorri batekin liburuak irakurtzen zituen bezerorik ez zegoenean.

Hala, Suarezek maite izan ditugun pertsona zein tokiei lotuta dauden abandonuaz, galeraz eta doluaz idatzi du. 20 urte baino gehiagoko bere ibilbide literarioan, aurreko Irautera atera zenetik lau urtera, beste ale bat ekartzera, beste mugarri bat jartzera dator poeta, indar handiko irudi eta ideiak biltzen dituena, irakurlea bere baitan miatzen jarriko duena.

You may also like

Ahoz kontatu eta belarriz jasotako testuak bildu ditu Uxue Alberdik ‘Belarriko Kilkerrak’ liburuan
Posted on 2023-10-05 by KulturSharea
Liburuan hiru zutabe nagusi dira: ahozkotasuna, transmisioa eta [...]
Dani Martirena da ‘Kultur Zarea’ bideo bildumaren protagonista berria
Posted on 2023-10-02 by KulturSharea
Dani Martirena Indart eta Ana Ibañez Elosua legasarrek haurrendako lau [...]
Martin eta Xabier Etxeberria anaiek ‘Artxipelagoa’ podcastari komiki formatua eman diote
Posted on 2023-09-22 by KulturSharea
Idazleek Alex Sanvi eta Sergio Roman Sedyas ilustratzaileak izan [...]

Page 5 of 55

Zabaldu: