Irailaren 21ean egingo dute ekimenaren laugarren edizioa Tabakalerako Zine eta Ikus-entzunezko Laborategian, eta nazioarteko jaialdi, laborategi eta garapen-programetako profesionalak bilduko dira bertan.
Film bat egitea ez da nahikoa haren ibilbidea abiatzeko: zinemagile berriek harremanak, aliantzak eta proiektuak garatzeko aukerak ere behar dituzte. Ideia horretatik abiatzen da Kabia, Donostiako Zinemaldiak, Tabakalerak eta Elias Querejeta Zine Eskolak sustatutako ekimena. Laugarren edizioa irailaren 21ean egingo dute, eta euren ibilbidearen lehen etapetan dauden zinemagileak nazioarteko zinema-industriako profesionalekin harremanetan jartzea izango du helburu.
Topaketa 17:00etatik 19:00etara egingo dute Tabakalerako Zine eta Ikus-entzunezko Laborategian. Ondoren, parte-hartzaileek elkar ezagutzen eta harremanak sendotzen jarraitzeko aukera izango dute.
Kabian, Zinemaldiko Nest film laburren lehiaketan hautatutako hamalau lanetako lantaldeek eta Ikusmira Berriak, Noka eta 2deo Serieak programetako egoiliarrek hartuko dute parte, Eias Querejeta Zine Eskolako ikasleekin eta nazioarteko beste prestakuntza- eta garapen-programetako parte-hartzaileekin batera.
Proiektuak aurkeztu eta industriaren feedbacka jasotzeko aukera
Topaketaren formatua ez da soilik aurkezpenetara mugatuko. Zinemagileek euren lanak azaldu eta proiektuei buruzko feedbacka jaso ahal izango dute, zuzenean, nazioarteko jaialdi, laborategi eta garapen-programetako profesionalekin.
Aurten, besteak beste, Torino Film Lab, Les Arcs, Sarajevoko Jaialdia, Cannesko Semaine de la Critique eta Berlinaleko ordezkariak izango dira gonbidatuen artean. Finantzaketa, ekoizpen eta sustapen arloetako profesionalek ere parte hartuko dute.
Horrek aukera emango die zinemagile berriei euren proiektuak nazioarteko testuinguruan kokatzeko, harreman profesionalak sortzeko eta etorkizuneko lankidetzak abiatzeko. Iaz, berrogeita hamar pertsona baino gehiago bildu zituen Kabiak, eta aurten ere gonbidapen bidez egingo dute hitzordua.
Nazioarteko proiekzioa ez da, gainera, irailaren 21eko topaketara mugatuko. Zinemaldian zehar, deialdi horietako garapen-proiektuek pitch-bideoak izango dituzte Industria Online plataforman, Zinemaldiko industria profesionalaren gunean.
Talentu berria urte osoan laguntzeko
Kabia ez da jarduera isolatua. Tabakalerako Zine eta Ikus-entzunezko Laborategiak urte osoan garatzen duen talentu berrien aldeko lanaren barruan kokatzen da. Laborategiak ikus-entzunezko sorkuntza sustatzen du, arreta berezia eskainiz talentu berriak aurkitzeari, euskarazko sorkuntzari, berrikuntzari eta esperimentazioari.
Ikusmira Berriak egonaldi eta zinema-garapeneko programaren bidez proiektuak garatzeko laguntza eskaintzen du; Noka gorabidean diren zuzendarien film luzeei begira dago, eta 2deo Serieak telesailen esparruko talentu berria sustatzen du. Horiez gain, muntaketa eta postprodukzio fasean dauden proiektuei baliabide teknikoak eta espazioak eskaintzen dizkie Laborategiak, eta urtean zehar tailerrak, prestakuntza-saioak, proiektu-aurkezpenak, pitching eta networking jarduerak antolatzen ditu.
Zinemaldiaren barruan, berriz, talentu berriei ikusgarritasuna emateko beste bide batzuk ere badaude, hala nola Nest eta New Directors. Kabia sare horren beste pieza bat da: sorkuntza-prozesutik nazioarteko industriarako jauzia errazteko eta zinemagile berrien ibilbide profesionalak sendotzeko topagune bat.
