Pabellon 6 Antzerki Laborategiaren azken ekoizpenak familia-harremanen korapiloak eta kontraesanak eramango ditu oholtzara, umorez. Antzezlana urriaren 30etik azaroaren 22ra ere ikusi ahal izango da Pabellon 6n.
Patxo Telleriak idatzi eta zuzendutako Bizipoza antzezlana estreinatuko dute bihar, urriaren 27an, Bilboko Arriaga Antzokian, 19:30ean. korapilo-komedia honetan, familia bereko kideen arteko gatazkak, gaizki-ulertuak eta harreman kaltegarriak izango dira kontakizunaren ardatz. Olatz Ganboa, Josu Angulo Anthonisen, Ione Irazabal, Itxaso Gil eta Aiora Sedano dira protagonistak.
Istorioak familia bateko hiru belaunalditako kideen kezkak eta ikuspegi kontrajarriak azaleratzen ditu. Pablok uste du Leire alabari bizipoza falta zaiola; Mirenek, Leireren amak, zalantzan jartzen du bikotekidearen buru-osasuna; eta Mariak, amonak, familiako gainerakoek adinekoekiko errespeturik ez dutela sentitzen du. Egoera horri Ane psikoterapeuta gehituko zaio, familiaren arazoetan bere interes ekonomikoak ere badituena.
Leire hegazkin-istripu batean hiltzeko zorian dagoela dirudien une batean abiatzen da ekintza, baina egoera hori bizipoza berreskuratzeko terapia baten parte da. Telleriak umorea erabiltzen du maitasunaren izenean sortzen diren harreman korapilatsuak erakusteko eta pertsonaien ahuleziak agerian uzteko.
Pabellon 6 Antzerki Laborategiak euskara hutsean sortutako bigarren ekoizpena da, duela lau urte Arriagan estreinatutako Love & Money lanaren ondoren. Sormen taldean Adrian Garcia de los Ojos arduratu da musikaz, Betitxe Saitua eszenografiaz eta jantziez, eta Fernando Alcauzar eta Quique Gago argiztapenaz.
Arriagako estreinaldiaren ondoren, Bizipoza Pabellon 6ra iritsiko da. Urriaren 30etik azaroaren 22ra eskainiko dute, ostiraletik igandera. Sarrerak 17 euroan daude salgai, beherapenak aplikatzeko aukerarekin, Pabellon 6ren webgunean.
