Ane Zubeldiak 2024ko Igartza bekari esker ondu du Datorren udan ez gara hemen biziko ipuin bilduma. Gai, giro eta garai askotako istorio hauetan, bizitzaren amaieraren kontzientzia eta transzendentzia-sentipena pizten duten une magikoak uztartu ditu idazle hondarribiarrak.
Ane Zubeldia idazle eta itzultzaileak (Hondarribia, 1994) Elkar argitaletxearen eskutik kaleratu du Datorren udan ez gara hemen biziko liburua. Sei istorio independentek osatzen dute, bakoitzak bere nortasun eta atmosfera propioarekin. Egileak azaldu duenez, “ipuin bakoitzaren abiapuntuan batez ere sentsazio edo intuizio bat egon da, ez hainbeste gai konkretu bat”.
Ipuin horien artean denetariko paisaiak ageri dira, errealismo magikotik zientzia-fikziora: Donostiatik Burgosko herrixka batera trenez doan mutikoa, aitonaren emaztearen hilzoria zaintzera; osaba zenak Katalunian landutako harremanak eta artelan efimeroak deskubritzera doan emakumea; edota garai bati oharkabean agur esaten ari diren lau lehengusina, Zuberoako erreka batean gora. Halaber, zientzia-fikzioak eta ironia pop-enak arindutako zama bitalak, bikote-harreman baten arrastoak kantu-kapsuletan eta etorkizun distopikoetako giza taupadak ere kabitzen dira bilduma honetan.
Datorren udan ez gara hemen biziko ipuin bilduma Zubeldiaren bigarren lana da, pasa den urtean Kontra olerki liburua plazaratu zuen Susa argitaletxearekin. Horretaz gain, Mejillon Tigre kolektiboaren sortzaileetako bat da. Ane Garcia da bere benetako izena eta horrela sinatu ditu orain arte egin dituen itzulpen lanak, horietako bat dugu Friedrich Engelsen Etxebizitzaren auzia (Katakrak) liburua.
You may also like
