Gorka Urbizu: “Diskoa desazeleraziorako gonbidapen bat da, artea edo musika arretaz bizitzeko”

Posted on 2024-06-17 by KulturSharea

Lekunberrikoak bere musika unibertsora leiho txiki bat ireki nahi izan du Donostiako erakusketarekin.

Janela bat dugu Gorka Urbizu musikariaren Hasiera bat diskoaren kantetako bat, orain, erakusketa ere bilakatu dena. Janelak pasa den ostiralean ireki zituen ateak Donostiako Koldo Mitxelena Kulturunean, Dock of the Bay zinema dokumental musikalaren jaialdiaren programazioaren barruan.

Urbizurentzat bere lehen bakarkako diskoaren osagarria da erakusketa hau, “leiho txiki bat da Hasiera bat diskoaren sortze eta garatze prozesura gerturatzeko, batez ere, Ibai Arrieta argazkilariaren begietatik eta Alex Cabeza Trigg zinemagilearen instalazio bideografikoen bitartez. Horretaz gain, bira hasi eta lehen zuzenekoetako argazkiak ere badaude bertan”.

Urbizuk Berri Txarrak eta beste hainbat proiektutan oso aktibo ibili ondoren (Peiremans, Katamalo…), horretaz guztiaz askatzeko beharra sentitu zuen duela lau urte. Gelditzeko unea zela pentsatu zuen eta denbora tarte horretan itzalean egon ondoren, plazaratu du disko berria, sorkuntza prozesu berezi baten ostean. Izan ere, Lleida inguruko 1904ko antzoki zahar bat aukeratu zuen amaitu gabe eraman zituen abestiei forma emateko eta diskoa grabatzeko.

Musikariaren arabera, espazioak asko markatu du diskoa, batez ere, non eta nola grabatu den kontutan hartuta. “Zerbait berezia ikusten nuen hor, ez dut esango iraultzailea zenik, baina bai ezohikoa”. Arrieta deitu eta hara joateko gonbidapena egin zion musikariak. “Espazioak bazuen halako berezitasun bat, azken finean grabaketa estudio bat zen, baina baita etxe bat ere. Bertan, XX. mende hasierako antzoki bat zegoen eta hantxe gertatu zen dena”, kontatu du argazkilariak. “Etxera sartu eta areto horretara bidean, patio berezi batzuk zeuden, oso ondo atonduak, bakoitzak lorategi batekin. Azkenean leku guzti horiek bihurtu ziren lanleku, eta, era berean, lagungarri ere baziren honelako proiektu bat garatzeko”, azaldu du Arrietak.

Abestiak dira Urbizurentzat egitasmo honen zutabe nagusia, “kantetan jarri dut nire indar guztia, baina badira ere osagarriak, erakusketa, kasu. Hori ere aldarrikapen bat du, ematen du gaur egun nobedadearen diktadura bizi dugula. Gaur berrikuntza zara, baina bihar beste bat dator eta zure tokia hartzen du, eta zuk urteetan landutako zerbait iraungitze data izatera pasatzen da, horrek amorru handia ematen dit. Kariño handia jarri dut kanta hauetan, lan handia dago honen atzean.

You may also like

Ramon Olasagasti idazleak gazteei zuzendutako ‘Memoriaren giltza’ liburua plazaratu du
Posted on 2024-07-09 by KulturSharea
36ko gerra garaian, Ezkaba mendian zegoen kartzelako ihesaldian dago [...]
Rashid Khalidiren ‘Ehun urteko gerra Palestinaren aurka’ liburua ekarri du euskarara Iñaki Alegriak
Posted on 2024-06-20 by KulturSharea
Palestinako historiaz euskarazko libururik ez zegoela ikusita, eta [...]
Uztapide eta Xalbador. Bi adiskide mugaz gaindi liburua kaleratu du Pako Aristik Erein argitaletxearen eskutik
Posted on 2024-06-14 by KulturSharea
Uztapide eta Xalbador. Bi adiskide mugaz gaindi liburua kaleratu du [...]
‘Francesco Pasqualeren bosgarren arima’ ipuinez osatutako eleberria aurkeztu du Unai Elorriagak
Posted on 2024-06-04 by KulturSharea
Pasquale Algortako idazlearen arbasoa da eta liburua bere bizitzan [...]
Haurdunaldi subrogatuen inguruko analisi feministak bildu ditu June Fernandezek
Posted on 2024-05-23 by KulturSharea
Susa argitaletxearen Lisipe bilduma feministaren baitan ikusi du argia [...]
Mikel Etxaburu idazle bizkaitarrak ‘Manttalingo alaba’ poema liburua kaleratu du
Posted on 2024-04-24 by KulturSharea
Poemak musikatuz, Ondarroako idazleak ordubeteko emanaldi bat antolatu [...]
12356

Page 1 of 56

Zabaldu: