Jaialdia abenduaren 26an izango da Atarrabian. Antolakuntzak aurreratu duenez, kartela osatzen jarraituko du datozen hilabeteetan.
Aske jaialdiak aurrerapauso berri bat eman du bigarren edizioko egitaraua osatzen, eta hiru talde gehitu ditu kartelera: Sukena, Tremenda Jauria eta Añube. Azaldu dutenez, iragarpen hau hasiera baino ez da, eta datozen aste eta hilabeteetan artista eta talde gehiago ezagutzera emango dituzte.
Joan den ekainaren 23an jakinarazi zuten Arkada Social eta Des-kontrol taldeek Bi mailukadak izeneko azken bi kontzertu bereziak eskainiko dituztela, eszenatokiei behin-behineko agurra eman aurretik. Emanaldi horietako lehena abenduaren 26an izango da Atarrabian egingo den Aske jaialdian, eta bigarrena 2027ko otsailaren 20an, Durangoko 40 Minutu Rock jaialdian.
Lehen iragarpen harekin batera, bi jaialdietarako bono bikoitza jarri zuten salgai, baita Aske jaialdirako sarrera kopuru mugatu bat ere, prezio berezian. Orain, Sukena, Tremenda Jauria eta Añube gehitu zaizkie.
Lehen edizioan bezala, estilo musikal askotarikoak biltzea izango da Aske jaialdiaren helburuetako bat. Antolatzaileen esanetan, jaialdia auzolanean eraikitzen den egitasmoa da, eta musikaren bidez nazio askatasunaren aldarria zabaltzea da asmoa. Horren bidez, aske izateko nahia musikaren eta elkarlanaren bidez ere indartu nahi dute, eta bestelako Euskal Herri baten aldeko ikuspegia praktikara eramatea dute xede.
Aske jaialdirako sarrerak eta 40 Minutu Rock jaialdiarekin batera eskaintzen den bono bikoitza dagoeneko salgai dago jaialdietako webgunean. Antolakuntzak datozen hilabeteetan kartela osatzen jarraituko duela iragarri du, abenduaren 26an Atarrabian egingo den hitzorduari begira.