Nobela hau idazterako orduan bi kezka nagusi izan ditu buruan egileak: teknologiaren gehiegizko erabilpena eta deskarbonizazioa.
Aitziber Etxeberria idazleak Reset nobela distopikoa kaleratu du Erein argitaletxearen eskutik. Honetan, etorkizun hurbil bat irudikatzen du, ustezko gizarte hobeago batek dituen gabeziak erakutsiz eta etorkizuneko gizarte ereduei buruz hausnartuz.
Alegiaroaren 46.urtea. Klaustro Zuriak gidatzen duen M eremuko gizarte teknologiko eta aurreratuan, ustezko zuzentasunaren distira iluntzen duten itzal uneak hedatzen hasi dira han-hemenka. Azken Bateratzean eratu zen klasetan banaturiko gizarte eredu berriaren ongizatea bermatzea da, Segurtasun Departamentu buruaren, Mararen, egiteko nagusia. Zilar pribilegiatuen eta haien menpeko diren karbonikoen arteko oreka mantentzea geroz eta zailagoa da, ordea. Hori gutxi balitz, gizarte justuago baten alde eragindako gehiegizko kontrolaren aurka borrokatzeko prest dagoen disidentzia eratzen ari denaren susmoa geroz eta sendoagoa da. Sistemak ez du akatsik onartuko.
Nobela hau idazterako orduan idazleak bi kezka nagusi izan ditu buruan: teknologiaren gehiegizko erabilpena eta deskarbonizazioa. Egileak adierazi duenez, “egia da mundu digital batean bizi garela eta gure bizitza erabat aldatu duela. Ukaezina da aurrerapen pila bat ekarri dizkigula, onura pila bat… eta gure bizitza gaur egun ez genukela ulertuko teknologia hori gabe, baina egia da baita ere teknologia horrek ilunagoa den beste alde bat ere badaukala. Bere erabilerak gure bizitza erabat aldatu du: kontsumo ohiturak, gure aisialdia, besteekin harremantzeko moduak… Horretaz gain, fake news-ak errez zabaltzea, desinformazioa, sortu ditu.
Eleberriaren beste gai nagusia aldaketa klimatikoa da, “nahiz eta batzuk ukatu egiten duten, uste dut bistakoa dela hemen dagoela, eta gugan izango duen eragina hasieran uste genuena baino handiagoa izango dela”, adierazi du Etxeberriak.
You may also like
